Израелската армија го призна убиството на новинарот на Ал Џезира во Газа

EРУСАЛИМ/ИСТАНБУЛ (АА) - Израелската армија денес го призна убиството на новинарот на катарската телевизија Ал Џезира во Појасот Газа, јавува Анадолу.

Портпаролот на армијата, Авичај Адрае, рече дека Хосам Шабат бил убиен во понеделникот во заедничка операција на армијата и домашната безбедносна агенција Шин Бет.

Тој изјави дека Шабат, дописник на катарскиот канал Ал Џезира Мубашер, бил „снајперист во баталјонот Беит Ханун на Хамас и учествувал во напади врз израелски цели за време на војната во Газа“, што палестинските новинари силно го негираа.

Најмалку 208 палестински новинари се убиени во израелски напади врз Појасот Газа од октомври 2023 година, соопшти владината Канцеларија за медиуми.

На 18 март израелската армија започна ненадејна воздушна кампања врз Појасот Газа, при што се убиени речиси 800 луѓе, а повеќе од 1.600 се повредени и покрај договорот за прекин на огнот и за размена на затвореници што беше постигнат во јануари.

Над 50.100 Палестинци се убиени, главно жени и деца, а повеќе од 113.700 се повредени во бруталната израелска воена офанзива врз Газа од октомври 2023 година.

Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел е обвинет за геноцид пред Меѓународниот суд на правдата за неговите постапки во енклавата.