Израелската министерка за информации поднесе оставка

КУДС (АА) - Израелската министерка за информации, Галит Дистел-Атбарјан, доцна синоќа објави дека донела одлука да поднесе оставка, пренесува Анадолу.

„Одлучив да поднесам оставка од функцијата министер за информации и му благодарам на премиерот Бенјамин Нетанјаху за довербата што ми ја даде“, се наведува во соопштението објавено од нејзиниот кабинет.

Тоа е прва оставка од составот на Владата на Нетанјаху по последната ескалација во Газа.

„Се враќам да ви служам од Кнесетот (Парламентот)“, додаде министерката, која е членка на партијата Ликуд.

Тековниот конфликт започна кога палестинската група Хамас ја започна операцијата „Поплава Ал Акса“, ненадеен напад од повеќе страни со низа ракетни лансирања и инфилтрација во Израел преку копно, море и воздух.

Хамас соопшти дека тоа е одмазда за рациите во џамијата „Ал Акса“ во окупираниот Источен Кудс (Ерусалим) и зголеменото насилство од страна на еврејските доселеници врз Палестинците.

Како одговор, израелската војска ја започна операцијата „Железни мечеви“ против позиции на Хамас во Појасот Газа.