Израелски рабин бара протерување на Палестинците од окупираниот Западен Брег

Израелски рабин повика Палестинците да бидат протерани од окупираниот Западен Брег, тврдејќи дека неевреите немаат национални права во она што тој го опиша како „земјата Израел“, пренесува Анадолу.

На снимката објавена вчера од Ал Џезира на англиски јазик се слуша како Менахем Бен Шахар ѝ кажува на група дека Арапите кои одбиваат да го прифатат еврејскиот суверенитет треба да ја напуштат територијата.

Бен Шахар, исто така, вели дека дури и петгодишно дете „го губи своето право на постоење“ ако родителите на детето се сметаат за „непријатели“.

Датумот и точната локација на средбата не се познати.

Израелската полиција го приведе на распит Бен Шахар во октомври 2025 година под сомнение за ширење екстремистички пораки и поттикнување насилство против Палестинците, според израелските медиуми. Тој претходно повика палестинскиот град Хувара да биде „збришан“.

Сите израелски населби на окупираниот Западен Брег се нелегални според меѓународното право. Меѓународниот суд на правдата во советодавното мислење од јули 2024 година изјави дека континуираното присуство на Израел на окупираната палестинска територија е незаконско и треба да заврши „колку што е можно побрзо“.