Израелски снајперисти застрелаа жена која работи во болницата Ал-Авда во Северна Газа

ГАЗА (АА) - Израелски снајперисти смртно застрелаа жена доцна синоќа, која работеше во болницата Ал-Авда во северниот дел на Појасот Газа, која е под опсада на војската во последните денови, соопшти Владата во енклавата, пренесува Анадолу.

Луѓето од болницата немаат пристап до „вода, храна и лекови“ и се подложени на притвор и тортура, соопшти Министерството за здравство во Газа.

Израелската војска ја претвори болницата Ал-Авда во „воена касарна“, соопшти Министерството вчера.

Портпаролот на Министерството, Ашраф ал Кудра, изјави дека израелската војска држи 240 Палестинци, од кои 80 од медицинскиот персонал, 40 пациенти и 120 раселени лица засолнети во болницата.

Тој, исто така, рече дека Палестинците во болницата се без вода, храна и лекови, а израелската војска го спречува движењето меѓу одделите во болницата.