Кенија: Камион прегази пешаци, загинаа 10 лица

НАЈРОБИ (АА) - Вчера возач на камион што превезувал вреќи со ориз ја изгубил контролата над возилото и удрил во пешаци и автомобили во југозападниот дел на Кенија, при што животот го загубија најмалку 10 лица, пренесува Анадолу.

Камионот натоварен со ориз, што наводно возел по удолница, не закочил и налетал на пешаци и неколку автомобили во градот Мигори, тврдат очевидци.

Полицијата соопшти дека најмалку 10 лица ги загубија животите во несреќата, додека повеќе од 10 лица итно се префрлени во болница во округот Мигори.

Командантот на округот Мигори, Марк Ванџала, потврди дека 10 луѓе ги загубиле животите, изразувајќи загриженост дека е можно бројката да се зголеми, поради преживеаните кои се потешко повредени.

Инцидентот предизвика застој во сообраќајот, а властите и службата на итната помош се бореле да го расчистат местото на несреќата и да ги згрижат повредените.

Се претпоставува дека причина за несреќата е откажување на кочниците, а власта започна истрага во врска со настанот.