Либија: Откриена бактериска контаминација во сите подземни води во Дерна

ТРИПОЛИ (АА) - Владата за либиско национално единство соопшти дека по поплавите на истокот на земјата откриена е „бактериска контаминација“ во сите подземни водни ресурси во градот Дерна, како резултат на мешањето на отпадните води и распаѓањето на човечките тела, јавува Анадолу.

Генералната дирекција за прашања за чистење на животната средина при Министерството за локална самоуправа на Владата за национално единство наведе дека тимовите продолжуваат со испитување на водните ресурси во погодените градови преку спроведување на сеопфатни анализи на водата, вклучително и анализа на водата во цевката што влече морска вода во прочистувачот на пристаништето.

Се наведува дека цевката се смета за важен дел од процесот на десоленизација на морската вода во регионот, бидејќи црпи големи количини морска вода и ја насочува кон пречистителната станица, која е важен извор за снабдување со вода за пиење за Дерна и населението во околината.

„Резултатите од анализата покажаа дека сите јавни и приватни ресурси на подземни води се контаминирани со микробна контаминација. Резултатите покажаа и дека морската вода е хемиски и бактериски контаминирана како резултат на мешањето со канализацијата и распаѓањето на труповите во неа“, соопштија од Министерството.

Истакнато е дека тимовите продолжиле со дистрибуција на хлор во форма на таблети за дезинфекција на водата, како и со едукација и насочување на граѓаните за безбедно користење на водата.

Медитеранската бура Даниел ја погоди источна Либија на 10 септември, што доведе до поплави во неколку градови, Бенгази, Бајда, Ал Марџ, Соуса и Дерна, што резултираше со обемно уништување на инфраструктурата и илјадници жртви.

Дерна беше најтешко погодена од смртоносните поплави, а ситуацијата се влоши со уривањето на двете големи брани во тој град.

Светската здравствена организација (СЗО) наведе дека повеќе од 4.000 луѓе загинале како последица на поплавите во Либија, а над 8.500 се водат како исчезнати.

Меѓутоа, според податоците на силите лојални на Парламентот со седиште во источна Либија, во катастрофалните поплави загинале најмалку 4.120 луѓе.

Над половина од здравствените установи во градот Дерна и регионите Марџ и Џебел ал-Ахдар станаа делумно или целосно нефункционални.

Обединетите нации и партнерите обезбедуваат услуги како што се основање теренски болници во регионот, дистрибуција на основни залихи на помош, храна и вода и обезбедување психо-социјална поддршка.

И покрај напорите за поправање на инфраструктурата, оштетените патишта, повремените прекини на струја и интернет, како и логистичките ограничувања, и понатаму влијаат на активностите за обезбедувањето помош.