Лукашенко: Саботажата на авионот А-50 од страна на Украина е спречена

ИСТАНБУЛ (АА) - Белорускиот претседател Александар Лукашенко изјави дека саботажата на авионот А-50 во воздухопловната база „Мачулишчи“ во регионот Минск од страна на Украина била спречена од властите, пренесува Анадолу.

За време на церемонијата на доделување награди во главниот град Минск, Лукашенко тврдеше дека едно лице и неговите соучесници, од кои сите наводно работат за Службата за безбедност на Украина, биле приведени пред да се обидат да направат саботажа, јави белоруската државна новинска агенција „Белта“.

„Службата за безбедност на Украина и раководството на ЦИА разработија операција против Република Белорусија зад нашиот грб или од страна“, рече Лукашенко, тврдејќи дека лицето кое е приведено е етнички Русин роден во Украина, кој исто така имал руски и украински пасош.

„Тој беше регрутиран од украинската разузнавачка служба веројатно во 2014 година. ИТ-професионалец или некој што добро ги познава ИТ-технологиите. Тој беше обучен да извршува терористички напади“, тврди Лукашенко.

Тој додаде дека нападот бил подготвуван шест до осум месеци однапред, а лицето било обучувано повеќе од еден месец од страна на безбедносните служби на Украина пред да биде испратено во земјата.

Белорусија, близок сојузник на Русија, помогна во тековната војна на Москва против Украина - која десеткуваше големи делови од земјата и доведе до масовни смртни случаи и раселувања - но не е директна страна во војната.

Лукашенко минатиот декември изјави дека Минск не планира да се бори против Украина, но дека ќе одговори доколку биде нападнат.