Молдавија: Проевропската политичарка Санду полага заклетва за втор претседателски мандат

КИШИНЕВ (АА) - Во Молдавија, проевропската политичарка Маја Санду, која на изборите во ноември тесно го победи прорускиот кандидат, денес ќе положи заклетва за втор претседателски мандат, јавува Анадолу.

Војната во соседна Украина има силно влијание и врз Молдавија, која ја обвинува Русија за мешање во изборите, а последниве денови и за изнуда од гасната компанија Гаспром.

Односите помеѓу двете поранешни советски републики се крајно напнати. Молдавија сѐ повеќе се приклонува кон Европа, а во земјата, истовремено со првиот круг од претседателските избори, се одржа и референдум за вклучување во Европската Унија како стратегиска цел во Уставот. Референдумот успеа.

Молдавија ја обвини Русија за операции и обиди да влијае врз изборите, во кои главна улога имаше бизнисменот Илан Шор. Наводно, од Москва дошле најмалку 14 милиони долари за гласови за поддршка на противкандидатот Александар Стојаноглу и гласови против на референдумот.

Ситуацијата дополнително се комплицира со кризата со снабдувањето со руски гас преку Украина бидејќи тоа може да значи големи проблеми и за Молдавија и за непризнатата република Придњестровје на источниот дел на земјата.

Молдавија најголем дел од електричната енергија добива од термоцентралата во Придњестровје, а природниот гас влегува во републиката од исток, кој Украина престанува да го снабдува на 1 јануари.

Молдавија се залага за алтернативни траси низ Туркије, но за тоа ќе биде потребно плаќање, а Владата во Тираспол, навикната на бесплатни руски извори на енергија, не сака да се согласи со тоа. Руските разузнавачи тврдат дека Санду е подготвена дури и за вооружен конфликт со Придњестровје доколку Молдавија остане без струја по Нова година.

Се предвидува уште една во низата компликации поради кои словачкиот премиер Роберт Фицо во неделата ја посети Москва и предизвика остри обвинувања и од словачката опозиција и од украинскиот претседател Владимир Зеленски, кој зависноста на Словачка од рускиот гас ја опиша како голема безбедносна закана.