Ömer Faruk Yıldız
15 Октомври 2021•Ажурирај: 17 Октомври 2021
ЖЕНЕВА
Високиот комесаријат за бегалци на Обединетите нации (УНХЦР) повика на забрзување и олеснување на правниот процес неопходен за луѓето кои избегале од Авганистан да се вратат кај своите семејства од земјите во кои се засолнети, пренесува Агенција Анадолија (АА).
Шабиа Манту, портпаролката на УНХЦР, на прес-конференција одржана во Канцеларијата на ОН во Женева ја оцени најновата ситуација во Авганистан.
Изјавувајќи дека најновите политички случувања во Авганистан ги доведоа во тешка ситуација Авганистанците кои сакаат да ја напуштат земјата и да се соединат со своите семејства во странство, Манту рече: „Оние што побарале азил или се засолниле во други земји од Авганистан, продолжуваат да бидат одвоени од нивните семејства поради губење на протокот на информации во постапката за обединување на семејството.“
Меѓу другото, Манту истакна дека авганистанските бегалци од многу земји дошле во канцелариите на УНХЦР за да ја пренесат својата загриженост за безбедноста на нивните семејства.
Посочувајќи дека обединувањето на семејствата е под заштита на меѓународното право, Манту нагласи: „УНХЦР ги повикува релевантните земји да дадат приоритет и да го олеснат процесот на обединување на семејствата.“
Манту, исто така, нагласи дека УНХЦР е загрижен дека авганистанските бегалци ќе се соочат со правни пречки во процесот на повторно обединување со нивните семејства.
Таа наведе дека мал број земји го забрзаа процесот на обединување на семејствата со започнување на „хуманитарна визна програма“ за авганистанските бегалци, и ги повика другите земји во кои има авганистански бегалци да постапат на овој начин.
Талибанците ја презедоа контролата врз главниот град Кабул без конфликт, откако претседателот Ашраф Гани ја напушти земјата на 15 август.
Соединетите Американски Држави го завршија повлекувањето од Авганистан на 31 август.
