Ikrame Imane Kouachi
15 Ноември 2024•Ажурирај: 18 Ноември 2024
ИСТАНБУЛ (АА) - Агенцијата за палестински бегалци на Обединетите нации (УНРВА) денес повтори дека се случува страшна хуманитарна криза во Газа, велејќи дека доволно помош никогаш не била достапна во текот на 13-те месеци од израелската офанзива, пренесува Анадолу.
„Луѓето се гладни. Секојдневно сме опкружени со луѓе кои молат за парче леб, на кои им е потребен пристап до вода“, изјави за „Си-ен-ен“ портпаролката на УНРВА, Луиз Вотериџ.
„Едноставно е неподносливо, ситуацијата на која е принудено населението. И многу од ова може да се реши со хуманитарен одговор. И тоа не го видовме 13 месеци“, додаде таа.
Вотериџ рече дека „едноставно не постои хуманитарец во Газа во моментов што верува дека има доволно помош за 2,2 милиони население, не само за последните денови и недели, туку и за 13-месечното времетраење на оваа брутална војна“.
Меѓународните агенции и агенциите на ОН предупредија дека северниот дел на Газа е на работ на глад поради тековниот воен напад, што започна минатиот месец. Опсадата го блокираше влезот на основните производи, вклучувајќи храна, вода и лекови.
Кризата, исто така, почна да се шири во централниот и јужниот дел на Газа во последниве недели, а брашното и другите основни производи недостасуваат на пазарите.
Израел уби повеќе од 43.000 луѓе во Газа од нападот на Хамас на 7 октомври 2023 година и се соочува со случај за геноцид пред Меѓународниот суд на правдата поради своите постапки.
