Папата Лав се сретна со жртви на злоупотреба во Перу

Папата Лав XIV денес се сретна со шест лица што биле жртви на злоупотреба од страна на свештеници и црковни институции во Перу, а претходно илјадници млади луѓе се собраа на Националниот стадион во Лима за да го пречекаат за неговата посета на Латинска Америка, објави „Ватикан њуз“, пренесува Анадолу.

Според соопштението на прес-службата на Светиот Престол, средбата се одржала во Апостолската нунцијатура во Лима и траела повеќе од еден час.

По краткиот поздрав во капелата на нунцијатурата, папата се сретнал поединечно со лицата што преживеале злоупотреба и ги сослушал нивните сведоштва за страдањата и болката што ги претрпеле.

Тие разговарале и за потребата од промена на начинот на размислување во Црквата преку сослушување на жртвите, утврдување на вистината, поддршка на процесите на закрепнување и создавање безбедна средина.

Претходно илјадници млади луѓе се собраа на Националниот стадион во Лима за да го пречекаат Лав, чија посета на Перу беше одбележана со емотивен пречек.

Стадионот беше исполнет со знамиња на неколку земји од Латинска Америка, меѓу кои Чиле, Боливија, Венецуела, Бразил и Еквадор.