Повеќе од 1.000 пожарникари се борат со пожарите во Португалија - 8 повредени

ЛИСАБОН

Осуммина пожарникари се повредени во шумските пожари што го зафатија централниот дел на Португалија. Со огнот во Португалија се борат повеќе од 1.000 пожарникари, пренесува Anadolu Agency (AA).

Португалската Цивилна заштита соопшти дека пожарот во саботата избувнал во дистриктот Кастело Бранко, 200 километри североисточно од престолнината Лисабон.

Шумските пожари во саботата попладне се проширија и во непристапните подрачја. Во гаснењето на пожарот се ангажирани стотина противпожарни возила и 10 канадери.

Во пожарот е повреден и цивил, кој набргу е евакуиран и хоспитализиран.

Ова е прв голем шумски пожар во Португалија во 2019 година. Во серијата шумски пожари што ја зафатија оваа земја во 2017 година, смртно настрадаа 106 лица.