БАНГКОК (АА) – Во Трговскиот центар „Сиам Парагон“ во главниот град на Тајланд, Бангкок, се наоѓа еден од најголемите аквариуми во светот – „Sea Life Bangkok Ocean World“, јавува Анадолу.
На површина од 10.000 квадратни метри, овој уникатен центар е дом на повеќе од 30.000 морски суштества и секоја година привлекува околу 1,5 милион посетители.
Овој импресивен подводен свет ги привлекува посетителите со своите тематски зони, интерактивни активности и образовни програми, кои го претставуваат морскиот свет од различни перспективи.
Првата атракција, зоната „Чудни и прекрасни“, ги истакнува најнеобичните морски суштества, како јапонскиот пајаков рак, наутилусот и електричната јагула.
Посетителите имаат можност да научат повеќе за нивните природни живеалишта и начини на адаптација.
Во зоната „Карпесто крајбрежје“ се прикажува морскиот живот во крајбрежните области, вклучувајќи морски ѕвезди, ежови и ракови, додека зоната „Тропска шума“ нуди автентично доживување на богатата флора и фауна на Амазон. Овде се наоѓаат џиновската арупаима која може да расте дури и до три метри, пираните, желки и дури и колонија на мравките листорези.
Централната атракција на аквариумот е „Океанскиот тунел“, кој нуди спектакуларен поглед од 270 степени кон резервоарот со ајкули, раи и други големи риби. Меѓу најретките жители се и ригестите ајкули чекан, кои посетителите можат да ги набљудуваат одблизу.
Популарна атракција е и зоната „Ледена авантура со пингвини“, каде што живее колонија на пингвини од видот Генту. Посетителите можат да ги гледаат како пливаат, се лизгаат и играат во нивното окружување.
Покрај атракциите, аквариумот нуди и интерактивни активности, како заткулисни тури за запознавање со грижата за животните, 4D-кино-искуство и можност за хранење на морските животни.
За авантуристите, програмата „Нуркај со ајкулите“ овозможува уникатно доживување на нуркање меѓу ајкулите и другите големи морски животни.
„Sea Life Bangkok Ocean World“ исто така игра важна улога во зачувувањето на морскиот живот преку истражувачки програми и програми за размножување на загрозените видови.
Со своите образовни ресурси и кампањи, аквариумот се стреми да ја подигне свеста за важноста на заштитата на океаните.
