Полицијата во Германија употреби солзавец врз демонстрантите на пропалестинскиот собир во Берлин

БЕРЛИН (АА) - Германската полиција употреби солзавец за да растера илјадници демонстранти во берлинскиот кварт Кројцберг вчера на одбележувањето на една година од почетокот на војната меѓу Израел и Хамас, јавува Анадолу.

Демонстрантите се собраа на плоштадот „Котбисер Тор“ држејќи транспаренти со слоганите „Престанете да го вооружувате Израел“, „Крај на геноцидот“ и „Слобода за Газа“.

Тие, исто така, го осудија полициското насилство за време на пропалестинските собири во текот на изминатата година.

Полицијата го прекина маршот во близина на улицата „Котбисер Дам“ и раскрсницата на улицата „Ленау“, спречувајќи ги демонстрантите да продолжат кон плоштадот „Херман“. Избувнаа судири, што доведе до жестока полициска реакција.

Неколку демонстранти се приведени, меѓу кои и демонстрант во инвалидска количка, кој беше насилно одвлечен во полициско возило.

Израел, прекршувајќи ја резолуцијата на Советот за безбедност на Обединетите нации која повикува на итен прекин на огнот, ја продолжи својата брутална офанзива врз Појасот Газа, по нападот на палестинската група Хамас минатиот 7 октомври.

Оттогаш во израелските напади убиени се над 41.800 луѓе, од кои повеќето жени и деца, а повеќе од 96.900 се повредени, според локалните здравствени власти.

Израелската офанзива го расели речиси целото население на територијата, а тековната блокада доведе до сериозен недостиг на храна, чиста вода и лекови.

Израел се соочува и со случај за геноцид пред Меѓународниот суд на правдата за неговите акции во Газа.