Полска протера 45 руски дипломати поради шпионажа

ИСТАНБУЛ (АА) - Полска денеска протера 45 руски дипломати поради сомневање дека шпионирале, соопшти полскиот министер за внатрешни работи Мариуш Камински, пренесува Агенција Анадолија (АА).

„Полска протера 45 руски шпиони кои се преправаа дека се дипломати“, соопшти Камински преку Твитер.

„Со целосна доследност и решителност ги протеруваме агентите на руските тајни служби од нашата земја“, додаде тој.

Станислав Зарин, портпаролот на полските специјални служби, претходно соопшти дека шефот на Агенцијата за внатрешна безбедност со Министерството за надворешни работи споделил листа од 45 идентификувани лица, кои тој ги нарече руски специјални служби и нивни соработници, кои „уживаа дипломатски статус во Полска“.

„Како што утврди Агенцијата, активностите на оние наведени во листата за протерување им служат на руските претпријатија формирани да ја поткопаат стабилноста на Полска и нејзините сојузници во меѓународната сцена и претставуваат закана за интересите и безбедноста на нашата земја“, се вели во соопштението, во кое се бара Министерството за надворешни работи на земјата да преземе „одлуки кои резултираат со итно протерување на наведените лица од нашата земја“.

„Едно од лицата наведени за протерување е претставник на руските тајни служби чија активност беше откриена за време на истрагата што резултира со апсење на полски државјанин под сомнение за шпионирање на 17 март 2022 година“, рече Зарин.

Полска, членка на ЕУ и НАТО, дели граница од околу 529 километри со Украина.