Necva Taştan Sevinç
14 Ноември 2025•Ажурирај: 15 Ноември 2025
ИСТАНБУЛ (АА) – Полска и понатаму ќе биде изземена од задолжителниот систем на Европската Унија за релокација на мигранти сè додека прима голем број украински бегалци, соопшти денес полскиот министер за надворешни работи Радослав Сикорски, јавува Анадолу.
Во разговорот за приватниот радиодифузер „Полсат њуз“, Сикорски рече дека ослободувањето не е трајно, туку ќе трае „добри неколку години“, објави ТВП Ворлд.
Тој истакна дека присуството на милиони Украинци во Полска претставува „огромен миграциски притисок“, признат и од Брисел.
„Иако имаме огромен број бегалци, Европа треба да покаже солидарност со нас“, рече тој.
„Денес ЕУ го признава тоа, оваа година и сè додека Украинците се тука ние сме ослободени од тој механизам.“
ЕУ се подготвува за примена на Миграцискиот пакт, голема реформа во системот за азил и миграција, со цел да се намали товарот врз државите на првата линија и да се овозможи порамномерна распределба на барателите на азил.
Според планот, земјите членки треба да придонесат во „Фондот за солидарност“ преку една од трите опции: прифаќање релоцирани баратели на азил, уплата на финансиски надоместок наместо релокација или обезбедување оперативна поддршка на надворешните граници на ЕУ.
Полска е една од шесте земји што може да побараат целосно изземање поради „зголемен миграциски притисок“, според Европската комисија. Во оваа група се и Австрија, Бугарија, Хрватска, Чешката Република и Естонија, кои исто така прифатиле значителен број украински бегалци поради руската инвазија.
Заменик-министерот за внатрешни работи Мачеј Душчик потврди дека Полска веќе поднела официјално барање за целосно изземање од механизмот на солидарност.
Барањето ќе биде разгледано на состанокот на Советот за правда и внатрешни работи на ЕУ на 8-9 декември, иако не е сигурно дека конечната одлука ќе биде донесена на тој датум.
Душчик изрази уверување дека изземањето ќе биде одобрено, нагласувајќи дека нема пречки или причини апликацијата да биде одбиена.
