Rabia İclal Turan
20 Јули 2025•Ажурирај: 21 Јули 2025
ВАШИНГТОН (АА) - Американскиот државен секретар, Марко Рубио, ја повика сириската влада вчера да ги користи безбедносните сили на југот за „веднаш“ да го запре насилството меѓу групите Друзи и Бедуини и да ги спречи понатамошни злосторства, известува Анадолу.
„Доколку властите во Дамаск сакаат да зачуваат каква било шанса за постигнување обединета, инклузивна и мирна Сирија без ДЕАШ и иранска контрола, мора да помогнат во завршувањето на оваа катастрофа со користење на своите безбедносни сили за да се спречи ДЕАШ и сите други насилни џихадисти да влезат во областа и да извршат масакри“, напиша Рубио на пларформата X.
Тој рече дека Вашингтон останал „силно вклучен“ во последните три дена во координирањето со Израел, Јордан и сириските власти во Дамаск во врска со „ужасните и опасни случувања“ во јужната сириска покраина Сувејда.
„Силувањето и колењето на невини луѓе, што се случувало и сè уште се случува, мора да престане“, објави Рубио, додавајќи дека Дамаск мора да „ги повика на одговорност и да ги изведе пред лицето на правдата сите што се виновни за злосторства, вклучително и оние во своите редови“.
Судирите избувнаа на 13 јули меѓу бедуинските арапски племиња и вооружените групи Друзи во покраината Сувејда.
Насилството ескалираше, а потоа следеа израелски воздушни напади, вклучително и врз сириските воени позиции и инфраструктура во Дамаск. Израел како изговор за своите напади ја наведе потребата од заштита на заедницата Друзи.
Сириското претседателство објави сеопфатен и итен прекин на огнот порано во саботата, по неколкудневните немири во јужната покраина.
Башар ал-Асад, кој владееше со Сирија речиси четвртина век, избега во Русија на 8 декември 2024 година, означувајќи го крајот на децениското владеење на партијата Баас, кое започна во 1963 година.
Во јануари беше формирана нова преодна администрација на Сирија предводена од претседателот Ахмад ал Шара.
