Русија негира поврзаност со заканите со бомби на избирачките места во клучните американски држави

ИСТАНБУЛ (АА) - Русија ги негираше тврдењата дека лажните закани за бомби на избирачките места во четири американски сојузни држави - Џорџија, Мичиген, Аризона и Висконсин - потекнуваат од руски домени за електронска пошта како дел од обидот да се попречат изборите, јавува Анадолу.

Руската Амбасада во Вашингтон ги отфрли обвинувањата, нарекувајќи ги наводите за руско мешање во американските избори во вторникот „злонамерна клевета“.

ФБИ вчера соопшти дека се „свесни“ за заканите со бомби упатени кон избирачките места во неколку држави, додавајќи дека многу од нив се чини дека потекнуваат од руски домени.

„Ниту една од заканите досега не беше утврдено дека е веродостојна“, се вели во соопштението на ФБИ.

Изјавата е дадена набргу откако државниот секретар на Џорџија Бред Рафенспергер, потврди дека „неверодостојни“ закани за бомби кои потекнуваат од Русија биле упатени на две избирачки места во округот Фултон.

Според извештаите на медиумите, заканите доведоа до кратка евакуација на две избирачки места рано утринава.