Burç Eruygur
05 Април 2023•Ажурирај: 06 Април 2023
ИСТАНБУЛ (АА) – Со официјалниот влез на Финска во НАТО и континуираните напори на Шведска да се вклучи во Алијансата ставија крај на „ерата на безбедност“ во нордискиот регион, истакна Русија, пренесува Анадолу.
Проширувањето на НАТО „ја заврши оваа ера, целосно го затвори секој разговор за фактот дека овој регион е полн со безбедност. Ова е новата реалност“, изјави портпаролката на руското Министерство за надворешни работи, Марија Захарова, во интервју за радио „Спутник“.
Захарова рече дека Вашингтон, на маргините на Минхенската безбедносна конференција во февруари, се занимавал со „пропаганда на сè што ја уништи европската безбедност“.
„Всушност, ова сега ѝ се случи на Северна Европа“, рече Захарова, дополнително нагласувајќи дека неутралниот статус на нордиските земји е тој што обезбеди „безбедносен ореол“ во регионот долго време.
Захарова, исто така, нагласи дека контактите на САД со Европа за безбедносните прашања биле засновани врз „чисто лични, прагматични и опортунистички интереси“ што не се поврзани со безбедноста на самата Европа.
„Кога ќе започне разговорот меѓу претставниците на САД и Европејците за безбедносните прашања, ќе има проблеми“, додаде Захарова.
Финска официјално се вклучи во НАТО вчера, а министерот за надворешни работи, Пека Хаависто, му го предаде потпишаниот договор за пристап на американскиот државен секретар, Ентони Блинкен, за време на официјалната церемонија во Брисел.
Во меѓувреме, обидот на Шведска да ѝ се придружи на Алијансата зависи од исполнувањето на низата ветувања што ѝ ги даде на Туркије минатата година за подобрување на нејзините антитерористички закони, меѓу другите чекори. И Унгарија допрва треба да ја ратификува кандидатурата на Шведска за станување сојузник во НАТО.
