Zehra Ulucak
05 Декември 2017•Ажурирај: 05 Декември 2017
СОЛТ ЛЕЈК СИТИ (AA) - Американскиот претседател Доналд Трамп потпиша уредба со којашто значително ќе ја намали површината на два национални парка во сојузната држава Јута, и со тоа предизвика остри реакции кај локалното население и меѓу активистите за заштита на околината, јавува Anadolu Agency (AA).
Со уредбата на Трамп, националниот парк Беарс Еарс (Bears Ears), кој се простира на 5.000 квадратни километри, ќе биде намален за 85 отсто, а за 50 отсто ќе биде намален и националниот парк Гранд Стеркејс-Ескаланте (Grand Staircase-Escalante), кој моментално зазема 7.000 квадратни километри.
„Јавните површини ќе бидат повторно дадени на јавно користење“, порача Трамп и додаде дека народот во Јута најдобро знае за што им треба таа површина.
Тој исто така порача дека грешат оние што сметаат дека неколкумина бирократи од Вашингтон имаат право да управуваат со природните ресурси во Јута.
„Дојдов во Јута за да направам историски чекор и на народот на оваа држава да му ја дадам земјата што му припаѓа“, изјави Трамп.
Од друга страна, на одлуката на Трамп се противат локалните племиња и невладините организации за заштита на околината.
Синоќа, пред зградата на парламентот во Јута се собраа околу 3.000 демонстранти кои бараа Трамп да се откаже од намалувањето на националните паркови.
Демонстрантите најавија дека со правни средства ќе се борат против тој чекор.
