Северна Кореја истрела балистичка ракета која прелета над Јапонија

ТОКИО (АА) - Северна Кореја денес по прв пат по пет години истрела балистичка ракета, која помина над Јапонија, со што ги предупреди своите граѓани да се засолнат, јавува Агенција Анадолија (АА).

„Министерство за одбрана на Јапонија соопшти дека она што изгледа како балистичка ракета веќе паднало“, објави новинската агенција Кјодо.

Претходно, јапонското Министерство за одбрана соопшти дека Северна Кореја лансирала „што се чини дека е балистичка ракета“ која може да се движи кон земјата, предупредувајќи ги своите граѓани да бараат засолниште.

Јапонскиот премиер Фумио Кишида го осуди чинот и побара од неговата администрација да собира информации и да соработува со сојузниците.

Јужна Кореја, во меѓувреме, остро ја осуди Северна Кореја за истрелување балистичка ракета и го предупреди Пјонгјанг за воведување посилни санкции и други последици, објавија локалните медиуми.

„Тоа беше јасно кршење на резолуциите на Советот за безбедност на Обединетите нации и сериозна провокација што го загрози мирот на Корејскиот полуостров, североисточна Азија и пошироко“, соопшти јужнокорејското претседателство, пренесе новинската агенција Јонхап.

Минатата сабота Северна Кореја истрела две балистички ракети со краток дострел во Источното Море, што е четврта провокација за помалку од една недела, соопшти војската на Јужна Кореја.

Се верува дека ескалацијата на тензиите на Корејскиот полуостров е одговор на денешната прослава на Денот на вооружените сили на Јужна Кореја, како и на воената вежба на Јужна Кореја, САД и Јапонија во Источното Море.