АЗЕЗ (АА) - Загубата на шестмина најблиски луѓе во борбата против терористите на ЈПГ/ПКК не ја ослабна надежта на храбриот борец од Единицата на постари војници во Тел Рифат, Мухамед Ајис, кој стои рамо до рамо со војниците на Сириската национална армија (SNA) со надеж еден ден да се врати дома.
„Ние не сме војници, ние се бориме против угнетувањето како војници“, вели Ајас (58) за Агенција Анадолија.
Тој рече дека ги загубил своите три зета и тројца внуци во борбата против режимот на Асад и ЈПГ/ПКК.
Околу 250.000 луѓе од областа Тел Рифат во Алепо и околните области беа принудени да избегаат во местата во близина на турската граница, откако нивните области беа окупирани од терористите на ЈПГ/ПКК со руска воздушна поддршка во февруари 2016 година.
Единицата на постари војници, составена од 25 членови, беше формирана пред десет години за борба против режимот на Башар ал Асад, а подоцна и терористичката група ЈПГ/ПКК.
Ајис, член на Единицата на постари војници, рече дека е на стража три дена во неделата за да ги заштити цивилите кои живеат во шатори во безбедните региони за време на суровите зимски и летни месеци.
„Оние кои надгледуваат во Единицата на постари војници се над 40 години“, рече тој.
Припадниците на Единицата на постари војници беа забележани како стојат рамо до рамо со војниците секој ден и ноќ и ја освоија почитта и симпатиите на младите војници на СНА.
Меѓу Единицата на постари војници најмногу се истакнува тоа што тие сè уште ги чуваат клучевите на нивните домови бидејќи никогаш не се откажале од надежта дека еден ден ќе се вратат во своите домови.
„Секогаш се замислувам себеси како ја отворам влезната врата, ги наводнувам дрвјата и зборувам со своите зетови. Еден ден, ќе го употребам клучот со кој постојано ја отворав вратата од мојата куќа. Бог да ни подари долг живот“, се молеше тој.
Мухамед Хатиб, друг член на Единицата, рече дека многу млади луѓе од Тел Рифат биле изгубени во други операции, особено во операцијата „Маслинова гранка“ - прекугранична воена операција започната од Турските вооружени сили и СНА во јануари 2018 година.
„Надгледувам заедно со војниците на СНА на фронтот. Нашите односи со младите се одлични. Јас сум почестен што се приклучив на Единицата“, вели Хатиб (60) за Агенција Анадолија.
Истакнувајќи дека нема разлика помеѓу нив и младите луѓе, тој рече: „Младите луѓе многу нè почитуваат, исто така и ние нив.“
„Сè што сакаме е ослободување на Тел Рифат од ЈПГ/ПКК. Ние ќе дадеме отпор до самиот крај“, вети тој, истакнувајќи: „Кога војниците на СНА нè гледаат нас, нивната одлучност расте.“
Од 2016 година Анкара реализира три успешни прекугранични антитерористички операции во северна Сирија за да превенира формирање терористички коридор и да овозможи мирна средина за жителите. Тоа се операциите „Штитот на Еуфрат“ (2016), „Маслинова гранка“ (2018) и „Извор на мирот“ (2019).
Во терористичката кампања против Турција што трае повеќе од 35 години, терористичката организација ПКК, која е на листата на терористички организации во Турција, Соединетите Американски Држави (САД) и Европската Унија, одговорна е за смртта на најмалку 40.000 луѓе, жени, деца и доенчиња. ЈПК е сириски огранок на ПКК.
