Ekip
13 Јуни 2022•Ажурирај: 14 Јуни 2022
РАМАЛА (АА) - Палестина денес ја поздрави одлуката на Норвешка да ги означи израелските производи од илегалните населби од окупираните територии како нивно место на потекло, јавува Агенција Анадолија (АА).
„Им благодариме на Норвешка за овој историски и морален потег“, рече палестинскиот премиер Мохамад Штаје на владиниот состанок.
Штаје ги повика сите земји да ги бојкотираат израелските производи од нелегалните населби на окупираните палестински територии во согласност со меѓународното право.
Норвешката Влада донесе одлука во саботата да го посочи потеклото на производите од нелегалните населби, што е во согласност со упатствата на Европската Унија.
Одлуката ќе се однесува на сите израелски производи произведени на окупираниот Западен Брег и сириската Голанска Висорамнина.
Во 2015 година, Европската комисија им препорача на своите земји членки да ја следат оваа практика, а тоа беше потврдено од Европскиот суд на правдата во 2019 година.
Западниот Брег, вклучувајќи го и Источен Ал-Кудс (Ерусалим), се сметаат за окупирана територија според меѓународното право, што ги прави сите еврејски населби во областа нелегални.
