ПАРИЗ (АА) - За време на протестите во Париз, главен град на Франција, дојде до судири меѓу полицијата и демонстрантите што излегоа на улица откако француската Влада одлучи да спроведе реформи во пензискиот систем без гласање во Парламентот, јавува Анадолу.
Полицијата користеше солзавец и водени топови за да ги растера демонстрантите пред плоштадот Конкорд во близина на зградата на Парламентот.
Група демонстранти го палеа ѓубрето и продавниците и со предмети ги гаѓаа полицајците.
Протестите продолжија во помалите улици во близина, каде што полицијата фати некои од демонстрантите.
Париската полиција приведе 197 лица поради вандализам, информираше телевизискиот канал BFMTV.
Протести и судири избувнаа и во други градови, како Лион и Рен, објави весникот Le Figaro. Синдикатите повикаа на уште една рунда протести на 23 март.
Француските пратеници што, исто така, се противат на планот, им се придружија на демонстрантите откако Владата ги поништи закажаните парламентарни избори.
Вчера претседателот на Франција, Емануел Макрон, одлучи да го искористи член 49.3 од Уставот на Франција за да го усвои контроверзниот нацрт-закон без гласање во Парламентот.
Реформите вклучуваат подигнување на старосната граница за заминување во пензија од 62 на 64 години.
Овој план предизвика бес кај граѓаните откако беше објавен минатата година, а масовни протести и штрајкови низ целата земја се одржуваат од јануари.
