Mohammad Sıo
31 Октомври 2024•Ажурирај: 01 Ноември 2024
КУДС (ЕРУСАЛИМ) (АА) - Десетици ултраортодоксни Евреи, Хареди, одржаа протести денес во Тел Авив против задолжителната воена служба, јавија израелските медиуми, пренесува Анадолу.
Демонстрантите се собраа пред канцеларијата за регрутирање во Кирјат Оно, гратче во подрачјето на Тел Авив, за да го изразат своето противење на израелскиот воен нацрт-закон.
Гневните демонстранти извикуваа „нацисти“ кон полицијата и го блокираа главниот пат каде избувнаа судири во кои е уапсен еден демонстрант, објави израелската јавна телевизија КАН.
Протестот избувна откако началникот на Генералштабот на Армијата, Херзи Халеви, неодамна повика на зголемено регрутирање и од резервистите и од редовните сили, јави израелскиот „Канал 12“.
Евреите Хареди, кои сочинуваат приближно 13 отсто од 10-милионското население на Израел, традиционално ги посветуваат своите животи на проучување на Тората во верски институции и избегнуваат воена служба, што тие го гледаат како закана по нивниот верски идентитет.
Со децении тие беа ослободени од служење воен рок, но во јули војската почна да издава нацрт-наредби за мажите Хареди.
Израелската Армија се соочува со недостиг на војници поради истовремените конфликти на повеќе фронтови, како Газа и Либан.
Израелската Армија ја продолжи разорната офанзива во Појасот Газа и покрај резолуцијата на Советот за безбедност на ОН со која се бара итен прекин на огнот, по нападот на Хамас минатата година.
Според локалните здравствени власти, оттогаш се убиени над 43.160 Палестинци, главно жени и деца, а над 101.500 се повредени.
Конфликтот се прошири и во Либан, каде Израел започна со смртоносни напади низ целата земја како ескалација од едногодишната прекугранична војна меѓу Израел и групата од почетокот на војната во Газа.
Израел го прошири конфликтот на 1 октомври оваа година со започнување копнен упад во јужен Либан.
