БЕРЛИН (АА) - Германците внимателно следат додека Соединетите АМерикански Држави (САД) се подготвуваат за претстојните претседателски избори, при што многумина изразуваат длабока загриженост поради можноста поранешниот претседател Доналд Трамп да се врати на функцијата, јавува Анадолу.
Според истражувањето направено од Институтот „Форса“, 66 отсто од Германците се загрижени за можниот реизбор на републиканецот Трамп, а убедливи 77 отсто ја поддржуваат демократската кандидатка Камала Харис.
Стефан Хеце, комерцијален менаџер, се надева на победа на Харис, потсетувајќи на мандатот на Трамп во периодот од 2017 до 2021 година како период на скандали и дипломатски тензии.
„Мислам дека Германија гледа на изборите во САД многу загрижено, се разбира со загриженост што ќе се случи доколку победи Трамп“, изјави Хеце за Анадолу.
„Тој сè уште не го постигнал тоа, но ако победи, ескалацијата е веќе предвидлива. Тоа веќе го видовме во минатото, како Трамп гледаше на Германија додека беше претседател, како се однесуваше кон нашата канцеларка. Тоа веќе беше скандал во тоа време“.
„Мислам дека ќе биде голема среќа доколку победи Камала, дефинитивно и за Европа и за Германија.“
Односот меѓу Трамп и поранешната германска канцеларка Ангела Меркел беше обележан со забележителни тензии, кои произлегуваат од фундаменталните несогласувања за политиката и големите разлики во стиловите на раководење.
Политиката на Трамп „Америка на прво место“ често се судираше со посветеноста на Меркел за мултилатерализмот и ЕУ. Критиките на поранешниот претседател за трговскиот суфицит на Германија со САД и неговите барања за зголемени трошоци за НАТО од европските сојузници, особено Берлин, дополнително ги заострија односите.
Лотар Кох, пензиониран Германец, истакна дека упадот во американскиот Капитол во 2021 година и последователните правни проблеми на Трамп значително ја нарушиле довербата на јавноста во неговата посветеност кон демократските принципи.
„Многу сум песимистичен. Победата на Трамп би била катастрофална, не само за Америка, туку и за моралното ткиво на човештвото како целина“, изјави Кох за Анадолу.
„Фактот дека некој со такво криминално досие може да биде избран за претседател на толку влијателна нација треба да биде алармантен за сите. Оние кои не се загрижени за оваа можност треба да се преиспитаат себеси“, рече тој.
„Тоа е всушност страшна перспектива и Европа е секако особено погодена, особено за време на конфликтот меѓу Русија и Украина. Ова се катастрофални услови, доколку Трамп со своето неверојатно незнаење повторно стане претседател, тоа би било катастрофа.“
- „Харис би била подобра опција“ -
Неодамнешните анкети откриваат дека потпретседателката Харис има голема предност во Германија, очигледно поради нејзините изјави за демократските принципи, мултилатерализмот и важноста на трансатлантските односи.
Нејзиниот акцент на мултилатералниот пристап и меѓународната соработка е во целосна спротивност со многу критикуваниот едностран пристап на Трамп.
„Се надевам дека Камала Харис ќе победи. Мојата снаа е од САД и ни е многу важно Трамп да не добие уште еден мандат“, изјави за Анадолу Џинтра Котман, висок консултант.
„Победата на Харис би била добра за САД и нивните односи со Германија и Европа“, рече таа.
„Доколку победи Камала Харис, се надеваме дека работите повторно ќе функционираат подобро во НАТО, САД ќе останат активен партнер во НАТО, ќе има помалку тензии, а целокупната политичка ситуација малку ќе се смири“, додаде.
Котман, исто така, истакна дека многу жени ја поддржуваат Харис, бидејќи таа ќе биде првата жена што ќе ја има највисоката функција во САД.
„Мислам дека е голем чекор за многу Американци да гласаат за жена. Тоа е веројатно тешко за некои, но се надевам дека ќе успее“, рече таа.
Додека многу Германци се повеќе за Харис отколку за Трамп, исто така се зголемува перцепцијата дека Трамп би можел да излезе како победник, бидејќи неговите ветувања за ограничување на илегалната имиграција, намалување на даноците и зголемување на инвестициите ги привлекуваат американските гласачи загрижени за економските прашања.
Карлос Сперлинг, млад студент од Берлин, рече дека иако победата на Харис се чини дека е многу подобар исход за Европа и Германија, предлозите за политиката на Трамп за решавање на домашните проблеми звучат поразумно.
„Во врска со односот меѓу Германија и САД, јасно би рекол дека Харис би била подобра опција, поради овие економски тарифи и работи што Трамп сака да ги наметне, коишто би биле проблематични за нашата економија“, објасни тој.
„Но, ако го погледнете од друга перспектива, од американска перспектива, морам да кажам дека Трамп би бил подобро решение за американските граѓани. Тој повеќе се грижи за населението, сака тие да заработуваат повеќе, постои миграциска криза и во САД, и затоа морам да кажам дека Трамп има подобри решенија за населението.“
– Изборите во САД се клучни за Европа и Германија -
Германските бизниси се особено загрижени за плановите на Трамп за значително зголемување на царините на увозот од странство, бидејќи САД остануваат најголемиот извозен пазар за германските компании.
Во 2023 година, извозот во САД достигна 158 милијарди евра, што сочинува 10 отсто од вкупниот извоз на Германија.
Неодамнешното истражување на Институтот за економски истражувања „Ифо“ покажа дека 44 отсто од индустриските компании во Германија очекуваат негативни ефекти врз нивното работење доколку Трамп стане претседател.
Ова ги вклучува компаниите кои самите немаат директни извозни, увозни или производствени односи со САД, но можеби индиректно би можеле да бидат погодени од планираните царини на Трамп.
Бернд Алтусман, поранешен германски конзервативен пратеник, ги призна потенцијалните предизвици во односите меѓу САД и Германија по изборите, но исто така изрази претпазливост, наведувајќи дека билатералните односи меѓу двата сојузника во НАТО се доволно силни за да се справат со какви било потенцијални разлики.
„Тоа е силно партнерство меѓу Германија и САД и мораме да работиме заедно кој и да стане претседател. Оваа силна врска е за нашата безбедност и за нашиот економски развој во следните години“, изјави тој за Анадолу.
Алтусман рече дека следната американска администрација веројатно ќе ги зголеми своите очекувања од Европа, а особено од Германија, во врска со надворешната и одбранбената политика и меѓународните економски прашања.
„Овие избори ќе имаат големо влијание врз односите меѓу Северна Америка, особено САД и ЕУ, и тука за Германија“, рече тој.
„Мораме да работиме многу напорно во следните години за да управуваме со кризите низ светот, посебно во конкуренцијата меѓу Азија, особено Кина, и САД или Северна Америка и европскиот континент.“
Трамп вети дека ќе ја продолжи својата политика „Америка на прво место“ доколку биде повторно избран, нагласувајќи ја потребата да се заштитат американските работни места и индустрии.
Тој усвои цврст став кон Кина за време на неговата изборна кампања и постојано велеше дека ќе воведе повисоки царини за кинескиот увоз.
Во однос на НАТО, Трамп отворено ги критикуваше Германија и европските сојузници, инсистирајќи дека тие мора да ги зголемат трошоците за одбрана и да преземат поголема одговорност за меѓународната безбедност, навестувајќи дека САД би можеле да ја преиспитаат својата посветеност кон НАТО доколку европските земји не го поделат товарот.
