Урсула фон дер Лајен ја потврди „непоколебливата“ поддршка на блокот за меѓународното право по критиките

БРИСЕЛ (АА) - Претседателката на Европската комисија, Урсула фон дер Лајен, денеска ја потврди „непоколебливата“ посветеност на Европската Унија (ЕУ) кон меѓународното право и Повелбата на Обединетите нации (ОН), по критиките предизвикани од нејзините неодамнешни изјави дека Европа повеќе не може да се потпира на „систем заснован на правила“, јавува Анадолу.

Говорејќи во Европскиот парламент во Стразбур, Франција, Фон дер Лајен истакна дека Европската Унија и понатаму е цврсто втемелена врз принципите врз кои е создадена.

„Европската Унија е основана како мировен проект. Нашата непоколеблива посветеност на стремежот кон мир, на принципите на Повелбата на ОН и на меѓународното право денес е исто толку суштинска како и во времето на нашето создавање. И секогаш ќе ги браниме овие принципи“, рече таа.

Таа ги даде овие изјави по два дена откако се соочи со критики по изјавата дека „Европа повеќе не може да биде чувар на стариот светски поредок“, што, според критичарите, може да сигнализира отстапување од меѓународниот систем заснован на правила.

Поранешниот шеф на европската дипломатија, Жозеф Борел, ги отфрли тврдењата дека меѓународниот поредок заснован на правила станува застарен, нагласувајќи дека меѓународното право останува обврзувачко според договорите на ЕУ и дека неговото „истекување не може никој да го прогласи во говор“.

И заменичката на шпанскиот премиер, Јоланда Дијаз, ја критикуваше изјавата на Фон дер Лајен.

„Мораме да бараме почитување на меѓународното право. Сè друго е варварство. Затоа она што штотуку го кажа Урсула фон дер Лајен е недоволно“, изјави Дијаз.

Во своето обраќање пред европратениците, Фон дер Лајен повтори дека „не треба да се пролее ниту една солза“ за „режимот“ на Иран, кој е под напади на САД и Израел од 28 февруари, обвинувајќи го за децении репресија врз сопственото население.

Истовремено, таа нагласи дека препознавањето на природата на иранскиот режим не ја намалува посветеноста на Европа кон меѓународните норми.

„Гледањето на светот таков каков што е, во никој случај не ја намалува нашата решителност да се бориме за светот каков што сакаме да го изградиме“, рече Фон дер Лајен.

- Враќањето на руските фосилни горива би било „стратегиска грешка“ -

Фон дер Лајен предупреди и дека зголемените тензии на Блискиот Исток веќе влијаат врз глобалните енергетски пазари, при што цените на гасот пораснале за околу 50 проценти, а цените на нафтата за 27 проценти од почетокот на конфликтот.

Таа посочи дека порастот на цените ги чини европските даночни обврзници дополнителни 3 милијарди евра за увоз на фосилни горива за само 10 дена, што, според неа, ја покажува „цената на зависноста“ од енергија од нестабилни региони.

Фон дер Лајен укажа и на разликите во даночните политики меѓу земјите членки на ЕУ, нагласувајќи дека даноците и давачките остануваат национална надлежност, но можат значително да влијаат врз цените на енергијата.

Според неа, во некои земји електричната енергија се оданочува многу повеќе од гасот, при што малопродажната цена на електричната енергија е оданочена со 0 проценти во една земја, додека во други надминува 16 проценти.

„Тоа прави разлика. Постои простор за дејствување“, додаде таа.

Фон дер Лајен ги повика земјите од ЕУ да останат посветени на долгорочната енергетска стратегија на блокот, која вклучува проширување на обновливите извори и нуклеарната енергија, предупредувајќи дека враќањето кон руските фосилни горива би било „стратегиска грешка“.

„Тоа би била стратегиска грешка“, рече таа, тврдејќи дека тоа би ја направило Европа „позависна, поранлива и послаба“.