Уште 175 вработени од иранската нуклеарна централа „Бушер“ евакуирани во Москва

Русија денес соопшти дека уште 175 вработени, кои беа евакуирани од иранската нуклеарна централа, заминале за Москва, јавува Анадолу.

Персоналот од централата „Бушер“ ја поминал границата со Ерменија преку граничниот премин Нурдуз-Агарак и заминал со специјален лет вчера, соопшти руската Амбасада во Ерменија.

Вкупно 509 руски државјани се вратија преку Ерменија од почетокот на војната на САД и Израел против Иран, наведуваат од Амбасадата.

Москва изрази „длабока благодарност“ до Ерменија за безбедната евакуација на вработените во државната компанија „Росатом“, се додава во соопштението.

Во неделата, шефот на „Росатом“, Алексеј Лихачев, изјави дека повеќето Руси кои работат во „Бушер“ се успешно евакуирани и дека за следната недела е планирана нова евакуација.

Минатиот месец Русија започна со евакуација на својот персонал од централата поради ескалацијата на регионалните тензии, кои започнаа откако САД и Израел започнаа заедничка офанзива врз Иран на 28 февруари.

Во нападите досега загинаа повеќе од 1.400 луѓе, меѓу кои и тогашниот врховен лидер Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што се наоѓаат американски воени бази, предизвикувајќи жртви и уништување на инфраструктурата, истовремено нарушувајќи ги глобалните пазари и авиосообраќајот.