Уште 48 Палестинци убиени во израелските напади во Газа

ИСТАНБУЛ (АА) - Најмалку 48 Палестинци се убиени, а повеќемина се повредени од рано утрово во немилосрдните израелски напади низ Појасот Газа, соопштија медицински извори, јавува Анадолу.

Девет лица се убиени, а други се повредени кога израелски воени авиони бомбардираа куќа во областа Калбуш во бегалскиот камп Нусејрат во централна Газа.

Три тела се донесени во болницата Ал-Акса, а повеќемина се ранети по израелскиот воздушен напад врз куќа во градот Ал-Завајда во централна Газа.

Четворица Палестинци, меѓу кои две деца, се убиени, а други се повредени во израелски напад врз собир на цивили во бегалскиот камп Нусејрат.

Во близина на Коридорот Нецарим, тројца Палестинци кои чекаа хуманитарна помош се убиени од израелски оган во близина на американско-израелскиот дистрибутивен центар.

Уште двајца Палестинци се убиени и во тековните израелски напади врз централниот дел на Појасот.

Уште шест Палестинци се убиени, а повеќемина се повредени во израелски напад врз дом во бегалскиот камп Шати во западниот дел на градот Газа.

Најмалку 11 тела се пронајдени по израелски напад врз куќа на улицата Ал-Хаџар во источниот дел на градот Газа, додека други останаа заробени под урнатините.

Во населбата Ал-Римал во западниот дел на градот Газа, еден Палестинец е убиен во израелски напад врз стан на улицата Ал-Вехда.

Во населбата Шеџаја на истокот на градот, друг Палестинец е убиен од во напад на израелски дрон.

Седум Палестинци се убиени и во одделни напади врз населби во градот Газа, иако нема веднаш достапни детални информации.

Во Кан Јунис, на југот на енклавата, еден Палестинец е убиен во израелски напад врз куќа во подрачјето на Џура ал-Акад.

Во Рафа, неколку Палестинци кои чекаа хуманитарна помош се повредени од израелски оган во близина на дистрибутивен центар во областа Ал-Шакуш.

Израелската армија уби над 65.900 Палестинци, повеќето од нив жени и деца, во Газа од октомври 2023 година. Воздушните и копнени напади ја претворија Газа во урнатини, втурнувајќи го нејзиното население во глад.