Yusuf Özcan
28 Октомври 2020•Ажурирај: 02 Ноември 2020
ПАРИЗ (АА) - Француската пратеничка Клементин Отен, во однос на антиисламските изјави во земјата, рече дека Франција со секој изминат ден наликува на претфашистичко општество, пренесува Агенција Анадолија (АА).
Антиисламскиот став на претседателот Емануел Макрон и изјавите на политичарите насочени кон муслиманите се прашање за кое најмногу се зборува во земјата.
Отен, пратеничка од екстремно левичарското движење „Непокорна Франција“ (LFI) и новинарка, во својата статија во весникот „Ле монд“ напиша дека по убиството на наставникот Самуел Пати на 16 октомври, политичарите, особено поранешниот премиер Мануел Валс, претпочитаат да ги навредуваат муслиманите наместо да формираат единство.
Истакнувајќи дека борбата против тероризмот треба да се спроведува со разум, а не со емоции, Отен рече: „Франција е пред губење на контролата. Нашата земја наместо да ги брани слободите и демократијата, таа ги гази. Дебатите во Франција се претворија во натпревар на крајно десничарски идеи.“
Отен потсети дека земјата сака да го забрани носењето марама и да се забранат рафтовите во маркетите каде што се продаваат халал производи.
Истакнувајќи дека во земјата наместо логиката и универзалната мудрост, почнуваат да преовладуваат законите што ги ограничуваат слободите и чувството на омраза, Отен нагласи: „Ваквата клима нема да ги реши гигантските проблеми во кои се наоѓаме. Само ќе нè одведе до Граѓанска војна.“
Изјавувајќи дека насилството сè повеќе се зголемува на социјалните мрежи, Отен рече: „Нашата земја наликува на претфашистичко општество со секој изминат ден.“
Во арапскиот свет продолжуваат реакциите на антиисламските изјави на Макрон, а исто така, се зголемуваат и повиците за бојкот на француските производи.
