Црквите во Ерусалим повикаа на спротивставување на плановите на Трамп за преселување на Палестинците од Газа

ИСТАНБУЛ (АА) - Патријарсите и поглаварите на црквите во Ерусалим денес упатија итен апел во кој повикаа на спротивставување на плановите за иселување на Палестинците од Појасот Газа, јавува Анадолу.

Изјавата на црквите дојде како одговор на плановите на американскиот претседател Доналд Трамп за преселување на населението од Газа во соседните земји како Јордан и Египет и за потенцијалната американска контрола врз палестинската територија.

Се „предупредува на големите опасности“ што произлегуваат од плановите и се истакнува важноста на поддршката на цврстите ставови на јорданскиот крал Абдула Втори, египетскиот претседател Абдел Фатах ал-Сиси и другите лидери кои „јасно се спротивставија на какви било обиди за искоренување на жителите на Газа“.

Црковните лидери категорично го отфрлија она што го опишаа како „закана која демне“ од масовно принудно раселување, нарекувајќи го тоа „директен напад врз човековото достоинство и фундаменталните човекови права“.

Трамп ја изнесе идејата за преселување на Палестинците од Газа во Египет, Јордан и други земји. Тој рече и дека САД ќе ја „преземат“ енклавата и ќе ја претворат во туристичка дестинација.

Планот наиде на голема осуда од арапскиот свет и пошироко.

Договорот за прекин на огнот и размена на заробеници е во сила во Газа од 19 јануари, со што е запрена израелската војна во која се убиени над 48.200 Палестинци, главно жени и деца, и која ја остави палестинската енклава во урнатини од израелското бомбардирање кое траеше повеќе од 15 месеци.