Selen Temizer
23 Септември 2021•Ажурирај: 24 Септември 2021
АНКАРА (АА) - Генералниот Секретар на НАТО, Јенс Столтенберг, се состана со генералниот секретар од Обединетите нации, Антонио Гутереш, во рамките на 76. сесија на Генералното собрание во Њујорк и дискутираа за начините за подобрување на соработката за глобалните прашања, пренесува Агенција Анадолија (АА).
Според соопштението издадено од НАТО, Јенс Столтенберг и Антонио Гутереш се осврнале на моменталната ситуација во Авганистан, а Столтенберг го информирал Гутереш за тековните напори на НАТО да ги доведе Авганистанците кои се во опасност на безбедно место.
Тој ја нагласи важноста талибанците да се земат за одговорни за нивните обврски, особено во врска со безбедниот премин, човековите права и тероризмот.
Додека лидерите се осврнуваа на другите итни притисоци во врска со безбедноста, вклучително и климатските промени како мултипликатор на кризата, Столтенберг рече дека борбата против климатските промени станала основна работа за НАТО и дека Алијансата презема дејствија со јасна политичка определба меѓу сојузниците за значително намалување на „воените емисии“.
Истакнувајќи дека соработката помеѓу НАТО и Обединетите нации се проширила во текот на изминатата деценија, во соопштението се наведува дека приоритетните области за заедничка работа вклучуваат поддршка на НАТО за мировните операции на ОН, борба против тероризмот, заштита на цивилите и жените, агенда за мир и безбедност.
Се додава дека НАТО обезбедил експерти за да се приклучат на напорите за обука на персоналот за мировни мисии на ОН, а во 2020 година, сојузничкиот воздушен сообраќај ја поддржа Светската програма за храна на ОН со испорака на теренска болница во Гана, како дел од одговорот против Ковид-19.
