Чешките одгледувачи на риби преземаат итни мерки поради продолжената суша

Одгледувачите на риби во Чешка почнаа да преземаат итни мерки поради продолжената суша, влошена од високите температури низ Европа, што врши притисок врз резервите на вода, објави Чешкото радио, пренесува Анадолу.

Соочени со недостиг на вода, одгледувачите на риби го намалиле или прекинале дополнителното хранење за да ја намалат потрошувачката на кислород од рибите, додека езерцата редовно се проветруваат, се наведува во извештајот.

Неколку езерца исто така биле испразнети со мрежи порано од вообичаеното.

Во областа Требоњ, значаен регион за одгледување риби, дел од езерцето Коцлиров со површина од 200 хектари (494 акри) наводно е испразнет, а рибите се префрлени во резервоари за чување.

Наводно, поради сушата недостига повеќе од една третина од водата во познатата мрежа на рибници во регионот.

Нивото на водата во езерото Свет исто така се намалило за 98 сантиметри бидејќи високите температури го забрзале испарувањето.