Шведска апелираше до Израел да го почитува меѓународното право поради катастрофалната ситуација во Газа

ЛОНДОН (АА) - Шефицата на шведската дипломатија Марија Малмер Стенергард во петокот апелираше до Израел да го почитува меѓународното право, велејќи дека ситуацијата во Газа е катастрофална, известува Анадолу.

Нејзините забелешки уследија по извештајот на ОН кој потврди дека 70% од смртните случаи во Газа биле жени и деца.

Канцеларијата за човекови права на ОН го осуди, како што го нарече, системско кршење на основните принципи на меѓународното хуманитарно право.

„Ситуацијата за цивилното население во Газа е нехумана, а десетици илјади луѓе ги загубија животите, вклучително и илјадници деца“, рече Стенергард на својот профил на платформата Х.

„Хуманитарната ситуација во Газа е катастрофална, а човечките страдања на цивилното население се огромни“, додаде шефицата на шведската дипломатија.

„Шведскиот став е јасен - го поддржуваме правото на Израел да се брани и ова очигледно право мора подеднакво да се спроведува во согласност со меѓународното право“, рече министерката.

Откако Израел ги започна нападите врз Појасот Газа на 7 октомври, повеќе од 43.500 Палестинци се убиени во палестинската енклава, од кои повеќето се жени и деца, а над 102.300 други се повредени, објавија локалните здравствени власти.

Израел пред Меѓународниот суд на правдата (МСП) е обвинет за геноцид врз Палестинците.