Премиерот на ТРСК ги осуди обидите за блокирање на младинскиот фудбалски камп на Барселона

Премиерот на Турската Република Северен Кипар (ТРСК), Унал Устел, вчера ги осуди обидите на една партија од крајната десница на кипарските Грци да блокира младински фудбалски тренинг-камп што шпанскиот клуб Барселона планира да го одржи во земјата, јавува Анадолу.

Барселона на својата официјална интернет-страница објави дека тренинг-кампот за млади фудбалери е планирано да се одржи во ТРСК на 11 септември.

Крајно десничарскиот Национален народен фронт (ЕЛАМ) го повика Министерството за надворешни работи на администрацијата на кипарските Грци да изврши притисок врз Шпанија за да го спречи одржувањето на кампот.

Во писмена изјава, Устел остро ги осуди напорите на ЕЛАМ насочени и кон кампот на Барселона и кон музичкиот фестивал „Замна“, што исто така е планирано да се одржи во ТРСК.

Тој рече дека овие иницијативи ги откриваат „вистинските намери“ на одредени кругови во администрацијата на кипарските Грци, на кои им пречи што кипарските Турци воспоставуваат контакти со светот, учествуваат на меѓународни настани и ја промовираат својата култура и уметност на глобално ниво.

„Пред нив повеќе не стои општество за кое очекуваат да остане изолирано“, рече Устел.

„Постои кипарско-турски народ кој ја прифаќа својата држава, гледа кон иднината со доверба и има решителност да ги зајакне своите врски со светот.“

Устел рече дека обидите за попречување го одразуваат, како што наведе, непроменетиот однос на политиката на кипарските Грци кон кипарско-турскиот народ.

„Не ѝ се покоривме на оваа логика вчера, ниту ќе ѝ се покориме денес“, рече тој.

„Кипарско-турската младина ќе се сретне со млади луѓе од целиот свет, ќе учествува во спортот и ќе ги споделува својата уметност и култура. Нашата држава ќе продолжи да го отвора патот за решителноста на нашиот народ во оваа насока.“

Устел потсети дека фестивалот „Нексус“, што требаше да се одржи во ТРСК, бил откажан по притисок од кипарската грчка страна.

Српската музичка организација ЕГЗИТ, која претходно го најави своето учество на септемврискиот фестивал во близина на замокот Киренија, била принудена да се повлече, според кипарско-турските претставници.

Наводно, повлекувањето било под влијание на дипломатските иницијативи што администрацијата на кипарските Грци ги презела со српската Влада, по притисок од ЕЛАМ.

Крајнодесничарската партија, исто така, повика на дипломатски притисок врз земјите на уметниците што се очекува да учествуваат на музичкиот фестивал „Замна“, во обид да се спречи меѓународното учество.