„Аселсан“ ја тестираше бункерската муниција „Толун-П“ со дронот „Бајрактар Акинчи“

Турската одбранбена компанија „Аселсан“ денес соопшти дека успешно ја тестирала својата наведувана бункерска муниција „Толун-П“, при што е постигната висока прецизност при погодокот, јавува Анадолу.

Тестирањето беше извршено со дронот „Бајрактар Акинчи“, произведен од турската компанија „Бајкар“.

Наведуваната муниција користи домашно развиени технологии и е наменета за дејствување против силно оклопни цели и објекти заштитени со армиран бетон.

„Толун-П“ обезбедува поголема оперативна ефикасност во споредба со конвенционалните видови вооружување и неодамна беше вклучена во класата на муниција од 250 фунти.

Муницијата се користи со повеќенаменскиот носач „Садак-4Т“, кој овозможува поставување на повеќе парчиња на платформи како што е дронот „Акинчи“.

Со помош на електронски запалки, кои можат да се програмираат од пилотската кабина за неколку секунди, овозможува истовремено уништување на повеќе стратегиски цели со едно дејство.

„Толун-П“ ги пробива целите со висока кинетичка енергија и специјално дизајниран врв, со што предизвикува максимални структурни оштетувања и овозможува пробивање на утврдени подземни засолништа, командни центри и оклопни хангари.

Од „Аселсан“ соопштија дека „Толун-П“ може да пробие до еден метар армиран бетон.

Во семејството муниција „Толун“ спаѓаат и ласерски наведуваната муниција „Толун-Л“, верзијата за електронско војување „Толун-ЕВ“, наведуваната муниција „Толун-Ф“, муницијата со инфрацрвено наведување „Толун-ИИР“ и копнената верзија „Толун-С“.