Güç Gönel
18 Јули 2020•Ажурирај: 19 Јули 2020
БУРСА (АА) - Турскиот претседател Реџеп Таип Ердоган денес положи камен темелник за изградба на фабриката за производство на првиот автомобил од турско производство. Тој најави дека фабриката ќе биде завршена во рок од 18 месеци, а првиот автомобил ќе биде произведен во последниот квартал од 2022 година, јавува Агенција Анадолија (AA).
Ердоган беше во Бурса, каде денес се одржа свеченост по повод поставување камен темелник на фабриката што ќе го произведува првиот турски автомобил, чиј прототип беше претставен на крајот на декември минатата година.
Турскиот претседател истакна дека станува збор за 60-годишен сон и потсети дека веста за производство на првиот автомобил од домашно производство одекна не само во Турција, туку и во целиот свет.
„Фабриката планираме да ја завршиме за 18 месеци, а првиот турски автомобил од лентата да го симнеме во последниот квартал од 2022 година“, рече Ердоган.
Говорејќи за фабриката, нагласи дека овој комплекс од темел ќе ја промени перцепцијата за фабриките кај луѓето.
„Она што денес започнуваме да го градиме не е само фабрика. Ова е огромен производствен комплекс со различни постројки кои од темел ќе ја променат перцепцијата за фабриките кај луѓето“, порача Ердоган.
Истакна дека верува дека ова дело, кое е симбол на визијата за голема, силна и иновативна Турција, ќе биде инспирација за идните генерации.
„Денес, сме горди не само поради нашата нова инвестиција, туку и затоа што и покрај епидемијата реализираме еден огромен проект. Секој припадник на нашиот народ го прифати овој проект, кој ја претставува силата и капацитет на нашата земја“, порача Ердoган, додавајќи дека анкетите покажуваат дека над 95 отсто од турските граѓани го поддржуваат проектот за турскиот автомобил.
Потсети и дека оние кои се вознемирени од растот, јакнеењето и самодовербата на Турција, веднаш започнале интензивна кампања за клевета за првиот турски автомобил.
Говорејќи за економијата на Турција, Ердоган порача дека информациите кои ги добива од терен силно го потврдуваат закрепнувањето на економијата.
„Во првите шест месеци од оваа година во индустрискиот регистар запишани се 7.000 нови компании и претпријатија“, рече Ердоган.
Турскиот министер за индустрија и технологија, Мустафа Варанк, пак, на свеченоста истакна дека првиот турски автомобил ќе биде паметен автомобил и пријател на животната средина, како и дека ќе биде произведен во фабрика која исто така ќе биде пријател на животната средина.
Турција кон крајот на декември минатата година го претстави прототипот на првиот електричен автомобил од домашно производство.
На проектот за развој на првиот турски автомобил работи Иницијативната група за производство на турскиот автомобил (ТОГГ), која беше формирана во јуни 2018 година со здружување на ресурсите на турските компании „Anadolu Grubu“, „BMC“, „Kok Grubu“, „Turkcell“, Унијата на турски берзи и стопански комори и „Zorlu Grubu“.
Првиот модел на турскиот автомобил ќе биде од категоријата SUV возила на електричен погон. Планот е до 2030 година да се започне со производство на пет модели на турски автомобили и тоа по три различни верзии за секој модел. Планирано е годишно производство на 175 илјади примероци.
Во првата фаза планирано е фабриката да вработи околу 5.000 работници, додека во периодот со целосен производствен капацитет се очекува да се обезбедат околу 20.000 работни места.
На свеченото поставување камен темелник во Бурса присуствуваа и турскиот потпретседател Фуат Октај, голем број министри и гости.
