Жителите на турскиот град Ван низ наноси од лавини патуваат на коњи до центарот

ВАН (AA) - Жителите на селото Суалти, кое се наоѓа во округот Башкале во турската провинција Ван, до центарот на градот патуваат на коњи низ „снежен коридор“ отворен на подрачје каде што, поради лавини, се собрале повеќеметарски наноси на снег, јавува Анадолу.

Суалти се наоѓа на иранската граница, на 98 километри од центарот на округот, опкружено со високи планини, а годинава се соочува со една од најсуровите зими во последните години.

Во селото со 80 домаќинства, каде што се чести меќави и обилни снежни врнежи, жителите поголемиот дел од денот го минуваат чистејќи снег и грижeјќи се за добитокот.

Поради долгата зима и снежната покривка што достигнува висина од неколку метри, патот што минува низ падините на високите планини често е затворен. На тој дел постои ризик од лавини на дури 18 локации, што дополнително го отежнува секојдневниот живот на жителите.

Понекогаш жителите остануваат отсечени со денови. Дури и кога патот е прооден, за да ги обезбедат основните животни потреби, тие мора да минуваат помеѓу снежни наноси високи од осум до девет метри, на местата каде што имало лавини.