Туркије загрижена поради ескалацијата на случувањата со иранските напади на ирачка и пакистанска територија

АНКАРА (АА) - Министерството за надворешни работи на Република Туркије изрази загриженост поради ескалацијата на ситуацијата и иранските напади на територијата на Ирак и Пакистан, јавува Анадолу.

„Загрижени сме поради развојот на настаните што започнаа со иранските напади врз одредени цели во Ирак, а потоа се проширија со напади врз одредени цели во Пакистан вчераутро и ескалираа со пакистанските напади врз цели во Иран утринава“, соопшти турското МНР.

Оттаму истакнаа дека сметаат дека проблемите треба да се решаваат со разбирање за пријателството и братството засновано на меѓусебното почитување на суверенитетот и територијалниот интегритет на државите во рамките на основните принципи на меѓународното право, особено на Повелбата на Обединетите нации (ОН), и дека сите прашања треба да се решаваат преку дијалог и соработка без дополнително загрозување на регионалната безбедност и стабилност.

„Ги повикуваме нашите пријатели и браќа Иран, Ирак и Пакистан да го осигурат мирот преку умереност и здрав разум. Република Туркије е спремна да ги сподели своите искуства и да придонесе за земјите од регионот за мирно решавање на споровите“, се додава од Министерството.