Водопадот Окчулар во округот Арач во турскиот град Кастамону, кој е прогласен за „природно заштитено подрачје од категоријата природно наследство“, со каскадната структура и природната убавина привлекува голем број посетители, пишува Анадолу.
Водопадот, кој се наоѓа во рамките на селото Окчулар, на 17 километри од центарот на округот, се спушта од височина од околу 10 метри меѓу дрвјата и создава мали каскади.
Водопадот Окчулар, опкружен со различни нијанси на зеленило, особено во летните месеци ги пречекува посетителите што сакаат да се разладат.
Кметот на селото Окчулар, Сабахатин Сојунмез, за Анадолу изјави дека нивното село се издвојува по природните убавини.
Посочувајќи дека секоја година голем број луѓе го посетуваат водопадот, Сојунмез рече: „Доаѓаат луѓе од Кастамону, Карабук и околните села. Особено во летниот период ги пречекуваме оние што доаѓаат од странство. Годишно водопадот го посетуваат околу 40 илјади посетители.“
Сојунмез истакна дека водопадот има специфична структура. „Годинава ова место е прогласено за природно заштитено подрачје. Нашиот водопад се спушта од височина од околу 10 метри. По коритото на потокот има и многу други водопади со различна големина. Има високи три-четири метри, а има и високи два метра. Бидејќи водата се движи каскадно, се создаваат мали водопади“, рече тој.
Сојунмез наведе дека поради каскадната структура водопадот Окчулар го споредуваат со травертините во Памуккале, додавајќи: „Ова место потсетува на Памуккале. Поради тоа што водата е варовита и поради минералите што ги содржи, на почвата се создал слој. Таму е бело, а овде е кафеаво. Тоа е предизвикано од составот на водата.“
Сојунмез истакна дека за одржувањето и чистењето на подрачјето се грижат жителите на селото и ги повика посетителите да не фрлаат отпад во природата.
Анил Орташенѓун, кој пристигна од Анкара со своето семејство, истакна дека првпат го гледа водопадот: „Тоа е прекрасно место. На почетокот се двоумев дали да влезам во водата, но потоа се навикнав. Водата е многу студена, но местото е прекрасно. Околината е бујна, зелена и убава. Ќе им го препорачам ова место на сите.“
Абдурахман Ердоган, кој дојде од Кастамону со своето семејство, рече: „Ова е прекрасно место. Одлично е што и Кастамону има вакви места на природата. Водата е малку студена, но освежувачка на овие горештини. Им го препорачувам на сите; одењето низ водата носи пријатно чувство на разладување.“
contact_the_ombudsman
is_there_an_error_in_this_story
