Турските сили во 2023 година неутрализираа 2.201 терорист

АНКАРА (АА) - Турските безбедносни сили во изминатата 2023 година неутрализираа вкупно 2.201 терорист, вклучително 81 во изминатата недела, наведоа од Министерството за одбрана на Туркије, јавува Анадолу.

Советникот за медиуми и односи со јавноста на Министерството за национална одбрана, Зеки Актурк, сподели информации за активностите на припадниците на безбедносните сили во борбата против тероризмот во изминатата година.

„По подмолните терористички напади, воздушните операции против терористичките цели во Северен Ирак и Сирија успешно уништија вкупно 71 цел, вклучително пештери, засолништа, нафтени капацитети и магацини“, рече Актурк, додавајќи:

„Нашата херојска армија се одмазди за крвта на нашите маченици. Годинава се неутрализирани 2.201 член на терористички организации, од кои 81 само во изминатата недела.“

Нагласувајќи дека сите операции во Сирија и Ирак се спроведуваат во согласност со правата на самоодбрана што произлегуваат од член 51 од Повелбата на Обединетите нации, Актурк рече:

„Наша единствена цел се терористите и сите елементи на ПКК/КЏК, ПЈД/ЈПГ и ДЕАШ во Сирија и Ирак.“

Тој нагласи дека во антитерористичките операции се запленети значителни количини експлозив и муниција.

Потоа тој изјави и дека безбедносните сили во изминатиот период ги презеле неопходните мерки за обезбедување на границата.

„Бројот на фатени лица во обид илегално да ја преминат нашата граница се зголеми на 13.640 во текот на годината. Вкупно 605 члена на терористички организации беа предадени на безбедносните сили, од кои 420 беа членови на ФЕТО. Бројот на луѓе блокирани пред да ја преминат границата беше 207.289. Во акциите спроведени минатата недела беа запленети околу 34 килограми дрога“, рече Актурк.