Aksidentohet një autobus në Kashmir, 33 pasagjerë të vdekur

Të paktën 33 persona humbën jetën dhe disa të tjerë u plagosën kur një autobus pasagjerësh me të cilin po udhëtonin rrëshqiti nga rruga duke përfunduar në një grykë në Kashmirin e administruar nga India, raporton Anadolu.

Mohammad Asif, një dëshmitar okular, tha për Anadolu se autobusi rrëshqiti nga rruga dhe përfundoi në grykën pranë zonës Trungal-Assar në autostradën kryesore në qarkun Doda të provincës Xhamu, afër 300 kilometra nga kryeqyteti i rajonit Srinagar.

Ndërsa po zhvillohen operacionet e shpëtimit, zyrtarët kanë frikë se numri i të vdekurve mund të rritet.

Jitendra Singh, një anëtar i parlamentit indian nga provinca Xhamu, tha se në shërbim do të vihet një helikopter për të transportuar pasagjerët e plagosur rëndë për trajtim në qytetin Xhamu.

"Është ofruar e gjithë ndihma e mundshme, sipas nevojës", shkroi ai në platformën X.

Guvernatori i Xhamu dhe Kashmirit, Manoj Sinha, tha se ai ka udhëzuar oficerët e lartë provincialë që të ofrojnë të gjithë ndihmën e nevojshme për të prekurit.

Të njohura si "autostradat vrasëse", disa rrugë në rajonet malore të provincës Xhamu, veçanërisht në qarqet Doda, Kishtwar, Rajouri dhe Poonch, janë të njohura për aksidente rrugore që i atribuohen kushteve të këqija të rrugës, drejtimit të automjetit në gjendje të dehur, shpejtësisë, mbingarkesës dhe rrëshqitjeve të dheut të shkaktuara nga moti i keq.

Gjithsej 805 njerëz vdiqën dhe 8.372 të tjerë u plagosën në 6.092 aksidente rrugore në rajonin Xhamu dhe Kashmir në vitin 2022, sipas të dhënave të nxjerra në muajin mars nga policia e trafikut.

Gjatë katër muajve të parë të këtij viti, 254 njerëz humbën jetën dhe më shumë se 2.300 u plagosën në 1.812 aksidente rrugore, shumica e të cilave ndodhën në rajonin Xhamu, tregojnë të dhënat.

Xhamu, i cili ishte kryeqyteti dimëror i shtetit të dikurshëm Xhamu dhe Kashmir, përbënte numrin më të madh (551) të vdekjeve dhe me 6.585 të lënduar midis viteve 2018 dhe 2022. Në krahasim, Srinagar, kryeqyteti veror i shtetit të dikurshëm, raportoi 229 vdekje nga aksidentet dhe 1.776 lëndime.