"Kina mund të mbyllë ngushticën e Tajvanit deri në vitin 2025"

Në ishullin e Tajvanit, i cili është në mosmarrëveshje me Kinën, qeveria paralajmëroi se administrata e Pekinit mund të arrijë kapacitetin ushtarak për të kontrolluar plotësisht ngushticën e Tajvanit midis kontinentit dhe ishullit deri në vitin 2025, transmeton Anadolu Agency (AA).

Sipas agjencisë japoneze të lajmeve "Kyodo", Ministria e Mbrojtjes së Tajvanit, në raportin e saj ndaj legjislativit theksoi se Kina në vitet e fundit ka përshpejtuar prodhimin e transportuesve të avionëve, anijeve shkatërruese dhe nëndetëseve dhe i ka bërë anijet sulmuese amfibë një njësi të veçantë detare.

Raporti paralajmëroi se Pekini mund të mbyllte ngushticën e Tajvanit deri në vitin 2025, duke bllokuar operacionet detare dhe ajrore të Taipeit.

Duke theksuar se ushtria kineze po përgatitet për një sulm ndaj Tajvanit dhe se ajo gjithashtu ka shtuar operacionet e "zonës gri" që nuk përfshijnë sulme direkte, thuhet se 380 avionë luftarakë vitin e kaluar dhe 600 këtë vit hynë në zonën e deklaruar nga Tajvani si Zonë e Identifikimit të Mbrojtjes Ajrore.

Hyrja e avionëve luftarakë kinezë në zonën e mbrojtjes ajrore të Tajvanit

Hyrja e avionëve luftarakë kinezë në zonën e shpallur nga Tajvani si Zonë e Identifikimit të Mbrojtjes Ajrore më 1 tetor, e cila është dita e përvjetorit të themelimit të Republikës Popullore dhe në ditët në vijim rriti tensionet në rajon.

Ministria e Mbrojtjes së Tajvanit njoftoi se 38 avionë luftarakë hynë në zonën e identifikimit të mbrojtjes ajrore më 1 tetor, 39 më 2 tetor, 16 më 3 tetor dhe 56 më 4 tetor.

Fluturimet më 4 tetor ishin "shkelja" me më shumë avionë në një ditë që kur Tajvani filloi të mbante shënime në shtator 2020.

Zona e Identifikimit të Mbrojtjes Ajrore, e cila nuk është e përcaktuar në të drejtën ndërkombëtare dhe nuk kontrollohet nga asnjë autoritet ndërkombëtar, në përgjithësi deklarohet në mënyrë të njëanshme nga vendet.

Zona e identifikimit nuk përfshin avionë civilë që nuk kanë ndërmend të shkelin hapësirën ajrore të përcaktuar të vendit, por avionët ushtarakë që hyjnë në zonë vlerësohen si një kërcënim potencial dhe paralajmërohen.