Koreja e Jugut ofron dialog me Japoninë për mosmarrëveshjet

Koreja e Jugut sot ofroi bisedime me Japoninë në përpjekje për të përmirësuar përkeqësimin disa mujor të lidhjeve midis dy vendeve, raporton Anadolu Agency (AA).

Oferta nga zyra presidenciale e Koresë së Jugut erdhi pasi Tokio hoqi Seulin nga lista e bardhë tregtare e partnerëve të besueshëm.

Japonia ka ushtruar presion ndaj Koresë së Jugut përmes kufizimeve tregtare, në vazhdën e vendimeve nga Gjykata Supreme e Seulit, duke urdhëruar firmat japoneze të kompensojnë viktimat e punës së detyruar gjatë sundimit të kaluar kolonial të Tokios.

Seuli i përshkallëzoi grindjet me Tokion javën e kaluar pasi njoftoi se nuk do të rinovonte marrëveshjen dypalëshe të inteligjencës ushtarake e cila skadon në nëntor.

Zyra presidenciale e Koresë së Jugut këmbëngul se mund të rishqyrtojë vendimin e javës së kaluar nëse Tokio tërhiqet nga kufizimet tregtare.

Ndërkohë, Zëvendës Këshilltari i Sigurisë Kombëtare të Seulit, Kim Hyun-chong akuzoi kryeministrin japonez Shinzo Abe për trajtimin e Koresë së Jugut si një "kundërshtar".

Në komentet e bëra nga agjencia lokale e lajmeve Yonhap, Kim shtoi se Qeveria e Koresë së Jugut "ndjen keqardhje të madhe" për masën japoneze të heqjes nga lista e bardhë.