Tunizi, arrestohet ish-kryetari i Parlamentit, Rached Ghannouchi

Lideri i Lëvizjes Ennahda dhe ish-kryetari i Parlamentit në Tunizi, Rached Ghannouchi u arrestua pas periudhës së paraburgimit prej 48 orësh, transmeton Anadolu.

Ghannouchi i cili u ndalua pas një bastisjeje të kryer në shtëpinë e tij nga forcat e sigurisë në kohën e iftarit më 17 prill, u arrestua sot në mëngjes nga gjykata tuniziane e shkallës së parë në të cilën ai u dërgua mbrëmë pas marrjes në pyetje në prokurori për 48 orë.

Avokati, Habib Bin Sidhum anëtar i Lëvizjes Ennahda, në një deklaratë nga llogaria e tij në median sociale tha se bashkë me Ghannouchi-n në dosjen e hetimit janë edhe 11 persona tjerë dhe se hetimi është në kuadër të dosjes "së komplotit kundër sigurisë së shtetit".

Nga e njëjta gjykatë u dha vendimi për gjykim të lirë ndaj emrave kryesorë të Lëvizjes Ennahda, Muhammed el-Kumani dhe Bilkasim Hasan si dhe ndaj 6 anëtarëve të tjerë të Lëvizjes Ennahda të cilët ishin ndaluar bashkë me Ghannouchi-n.

Reagimet për arrestimin e Ghannouchi-t dhe mbyllja e ndërtesave të partisë

Në një deklaratë me shkrim nga Lëvizja Ennahda lidhur me ndalimin e Ghannouchi-t iu bë thirrje opozitës të "qëndrojë në një vijë të vetme kundër shkeljeve dhe praktikave shtypëse ndaj të drejtave dhe lirive të politikanëve opozitarë".

Në deklaratë, arrestimi i Ghannouchi-t dënohet si "një zhvillim mjaft i rrezikshëm" dhe u kërkua lirimi i menjëhershëm i liderit të Ennahda-s.

Fronti Nacional Çlirimtar, struktura ombrellë e opozitës tuniziane, në një deklaratë më 19 prill njoftoi mbylljen e qendrës ku operojnë si dhe të qendrës së Lëvizjes Ennahda.

Ndërkohë edhe në një deklaratë nga Partia "Vullneti Tunizian", u njoftua se autoritetet e vendit kanë mbyllur selinë e partisë në kryeqytetin Tunis.

Nga autoritetet zyrtare nuk është dhënë ende ndonjë deklaratë në lidhje me atë se me çfarë akuzohet Ghannouchi.