لە ١٥١ ڕۆژدا لە غەززە ١٣ هەزار و ٤٣٠ منداڵ کوژراون

ئیستانبوڵ - AA

سوپای ئیسرائیل لە ئاکامی ئەو هێرشانەی لە ٧ی تشرینی یەکەمی ٢٠٢٣ەوە تا ئێستا دەیانکاتە سەر کەرتی غەززە، ١٣ هەزار و ٤٣٠ منداڵی کوشتووە.

نووسینگەی میدیای حکوومەت لە غەززە، دوایین زانیاریی لەبارەی ئەو هێرشانە بڵاوکردەوە کە ئیسرائیل لە ٧ی تشرینی یەکەمی ٢٠٢٣ەوە تا ئێستا دەیانکاتە سەر غەززە و پێی ناوەتە ١٥١هەمین ڕۆژەوە.

سوپای ئیسرائیل لە ٧ی تشرینی یەکەمی ٢٠٢٣ەوە تا ئێستا، لە کەرتی غەززە دوو هەزار و ٦٧٥ کۆمەڵکوژی دەرهەق بە کەسانی بێ بەرگریی فەڵەستینی، هاووڵاتیانی مەدەنی، منداڵان و ژنان ئەنجامداوە.

لە ئاکامی ئەو هێرشانەی ئیسرائیل ١٥١ ڕۆژە دەیکاتە سەر کەرتی غەززە، ١٣ هەزار و ٤٣٠ منداڵ و هەشت هەزار و ٩٢٠ ژن کوژراون.

لە ڕاگەیاندراوەکەدا باس لەوە کراوە کە هێرشەکان پێنج مانگیان تێپەڕاندووە و پێیان ناوەتە شەشهەمین مانگەوە و، هێشتا حەوت هەزار کەس بێسەروشوێنن کە زیاتر لە سەدا ٧٠یان ژن و منداڵن، ژمارەی ئەو کوژراوانەی گواستراونەتەوە بۆ نەخۆشخانەکان ٣٠ هەزار و ٥٣٤ کەسە و ژمارەی بریندارانیش ٧١ هەزار و ٩٢٠ کەسن.

لە ئەنجامی هێرشە بەردەوامەکانی ئیسرائیلدا بۆ سەر کەرتی غەززە ٣٦٤ کارمەندی تەندروستیی و ٤٨ کارمەندی بەرگریی شارستانی و ١٣٢ ڕۆژنامەنووس کوژراون.