پەیامی هاوخەمی سەرۆک بارزانی بۆ سەرکۆماری فەڕەنسا

هەولێر

بەپێی هەواڵێک لە ماڵپەری فەرمی سەرۆکایەتی هەرێمی کوردستانەوە، سەرۆکی هەرێمی کوردستان پەیامێکی هاوخەمی بۆ سەرکۆماری فەڕەنسا فڕانسوا ئۆلاند ناردووە کە لە سەرەتاکەیدا هاتووە: "ئەو کردەوە تیرۆریستییانەی شەوی ١٣ـی١١ـی٢٠١٥ لە پاریس ڕوویان دا و ژمارەیەکی زۆر قوربانیی لێ کەوتەوە لە ناخەوە ئازاری داین. بەناوی خۆم و گەلی کوردستانەوە هاوخەمیی خۆمان بە بەڕێزتان و گەلی فەڕەنسا ڕادەگەیەنم".

لە درێژەدا مەسعود بارزانی دەڵێت: "تیرۆر دوژمنی هاوبەشی هەموومانە و تیرۆریستان دژی هەموو بەهایەکی مرۆڤایەتین و لە هەر شوێنێنێک ژیان و پێشکەوتن و ئارامی هەبێت تیرۆریستانی دڵڕەش پەلاماری دەدەن".

لە کۆتایی پەیامەکەدا بەمجۆرە سەرەخۆشی دەربڕاوە: "گەلی کوردستان کە ئێستا لە شەڕێکی سەختی دژی تیرۆردایە و قوربانیی دەستی تیرۆرە، لەم ڕۆژە ناخۆشەدا، لەگەڵتان هاوسۆزە و بەشداری خەمتان دەکات و پاڵپشتی گەل و حکومەتی فەڕەنسایە.
سەرەخۆشی لە ئێوەی بەڕێز و کەسوکاری قوربانییان دەکەین و هیوای چاکبوونەوەی خێرا بۆ بریندارەکان دەخوازین".