بەرھەم ساڵح: "ئەرکمانە سەرکەوتنەکەمان تەواو بکەین"

ھەولێر - AA

سەرکۆماری عێراق، بەرھەم ساڵح رایگەیاند، ئەرکی ئێمەیە ئەمڕۆ سەرکەوتن تەواو بکەین بەپشتیوانیکردنی دەوڵەت و بەتواناکردنی بۆ ریشەکێشکردنی پاشماوەکانی تیرۆر و گەڕاندنەوەی ئاوارەکان و دەستەبەرکردنی ئاوەدانی.

بەرھەم ساڵح لە چوارەم ساڵیادی راگەیاندنی سەرکەوتن بەسەر رێکخراوی تیرۆریستی داعش، لە ھەژماری تایبەتی خۆی لە تۆڕی کۆمەڵایەتی تویتەر پەیامێکی بڵاوکردەوە.

سەرکۆماری عێراق نووسیوویەتی: "لە رۆژی سەرکەوتن بەسەر داعشدا، قارەمانێتی ھێزە چەکدارەکانمان لە سوپا، پۆلیس، حەشدی شەعبی و پێشمەرگە، ھەروەھا رۆڵی گەورەی مەرجەعی باڵای ئایینی لە ستایشکردنی ھێزی گەل و پشتیوانی ھاوڕێ و ھاوپەیمانی نێودەوڵەتیی وەبیردەھێنینەوە".

سەرکۆماری عێراق راشیگەیاند، "ئەرکمانە ئەمڕۆ سەرکەوتنەکەمان تەواو بکەین بەپشتیوانیکردنی دەوڵەت بۆ ریشەکێشکردنی پاشماوەکانی تیرۆر و گەڕاندنەوەی ئاوارەکان و دەستەبەرکردنی ئاوەدانی".