دەستگیرکردنی سێ تیرۆریستی داعش لە باکووری عێراق

ھەولێر ــ AA

وەزارەتی ناوخۆی عێراق راگەیاند کە سێ تیرۆریستی داعش لە پارێزگای نەینەوا باکووری عێراق، دەستگیرکراون.

وەزارەتی ناوخۆی عێراق لە راگەیەنراوێکدا ئاماژەی بەوەداوە کە ھێزەکانی ئاژانسی ھەواڵگریی سەربە بەڕێوەبەرایەتی ھەواڵگریی نەینەوا، سێ تیرۆریستیان دەستگیرکردووە کە بەپێی ماددەی چواری تیرۆر بەتۆمەتی ئەندامبوون لە داعش، داواکراوبوون.

بەپێی راگەیەنراوەکە ئەو سێ تیرۆریستەی کە دەستگیرکراون لە بەناو کەتیبەی خۆکوژانی سەربە داعش چەکداربوون و باس لەوەشکراوە کە لە میانی لێکۆڵینەوە بەراییەکاندا، دەستگیرکراوەکان دانیان بەوەداناوە کە سەربە داعشن.

لە کۆتایی راگەیەندراوەکەدا، ئەوە خراوەتەڕوو کە دەستگیرکراوەکان، بەئامانجی تەواوکردنی لێکۆڵینەوەکان لەگەڵیاندا، دەستبەسەرکراون.