دھۆک - AA
هەموو ئەو ڕزگاربووانەی دەستی داعش کە لە پارێزگای دهۆک تۆمارکراون و کەمدەرامەتن، لە ڕێی بەرنامەی جۆراوجۆری حکوومەتی هەرێمی کوردستان-عێراقەوە هاوکاری دەکرێن.
یەکێک لە ڕزگاربووەکان ئاماژە بەوە دەکات کە بەردەوام پێویستییان بە هاوکاری هەیە و، جەختیش لەوە دەکاتەوە کە تا ئێستا لە ترس و دڵەڕاوکێدا دەژین بەهۆی ئەو ئازار و ئەشکەنجەیەی لە ژێر دەستی تیرۆریستانی داعش بینیوویانە.
ھیڤی فازل دوای وەرگرتنی ھاوکارییەکەی لەلایەن حکوومەتەوە، بۆ ئاژانسی ئانادۆڵو گوتی: "ئێمەی ڕزگاربووی دەستی ڕێکخراوی تیرۆریستی داعش بەردەوام پێویستیمان بە ھاوکاریی ھەیە، چونکە لە دەستی داعش زۆر ناخۆشی و ترسمان بینیووە، تا ئێستاش ئەم ترسە ھەر لە دڵمان ماوەتەوە، بەداخەوە دوای نزیکەی نۆ ساڵ، ئێمە ھێشتا ھەر لە ژیانی ئاوارەییدا دەژین و ناتوانین بگەڕێینەوە سەر زێدی خۆمان".
لەکاتی ھێرشی داعش بۆسەر شنگال لە ساڵی ٢٠١٤ ژمارەیەکی زۆر لە ژن و منداڵانی ئێزدی لەلایەن چەکدارانی تیرۆریستی داعش ڕفێنران. دوای تێکشانی تیرۆریستانی داعش لە ناوچەکانی عێراق و سووریا، زۆربەی ئەو ژن و کچانەی ژێر دەستی داعش ڕزگارکران. حکوومەتی ھەرێمی کوردستان نووسینگەی ڕزگارکردنی ئێزدییەکانی کردەوە و تائێستاش لە ھەوڵدان بۆ دۆزینەوەی بێسەروشوێنبووانی دیکەی ئێزدی.
نەدیما عەبدو جەردو ڕزگاربوویەکی دیکەی ژێر دەستی ڕێکخراوی تیرۆریستی داعشە. ئەو بۆ ئاژانسی ئانادۆڵو ڕایگەیاند: "ھەر لایەنێک ھاوکاریمان بکات، ئێمە زۆر دڵخۆش دەبین، چونکە ئێمە پەرێشانین، بەداخەوە حکوومەتی عێراق تا ئێستا ھاوکاری نەکردووین لە کاتێکدا دەبووایە مووچەی مانگانەی بۆ ئێمەی ڕزگاربووی دەستی داعش تەرخان بکردایە".
پێشر بە بڕیاری سەرۆکوەزیرانی ھەرێمی کوردستان، مەسرور بارزانی، سەرەتای مانگی ئابی ٢٠٢٤، ھاوکاری دارایی بەسەر زیاتر لە سێ ھەزار و ٥٠٠ ھاووڵاتی ئێزدی ڕزگاربووی ژێر دەستی ڕێکخراوی تیرۆریستی داعش دابەشکران.
بەرپرسی لقی شاریای بنکەی ڕۆشنبیری و کۆمەڵایەتی لالش، دلشاد سەلیم بۆ ئاژانسی ئانادۆڵو گوتی: "حکوومەتی ھەرێمی کوردستان بەردەوام ھاوکاری ئێزدییەکان دەکات، ئەمڕۆش ئێمە بە ھەماھەنگی لەگەڵ ڕێکخراوی (KHALSAAID) ھاوکاریی خواردن و پاککەرەوەمان بەسەر ٥٠ کچ و ژنە ڕزگاربووی دەستی داعش لە سنووری کەمپی شاریا دابەشکرد".
دڵشاد سەلیم گوتیشی، "پلانمان ھەیە ھاوکاری زیاتریان بکەین بە تایبەتی لە ڕووی داراییەوە".
